O roteiro é de dificultade baixa e percorre o litoral sadense ao longo de 9,5 quilómetros desde o Castelo de Fontán ata a praia de Cirro
O roteiro Mariñán-Costa Doce foi presentado na pasada edición da Feira Internacional de Turismo (Fitur), que se desenvolveu en Madrid entre os días 28 de xaneiro e 1 de febreiro. Esta presentación tivo lugar no stand de Turgalicia e á mesma asistiron o Director Xerente de Turgalicia, Xesús Pereira; o presidente de Terra das Mariñas, Juan José Rocha e o Concelleiro de Turismo de Sada, o socialista José Garrote.
O último treito do roteiro Mariñán-Costa Doce foi inaugurado o pasado día 2 de novembro e serviu para completar un percorrido total de 9,5 quilómetros dun sendeiro litoral que discorre entre o Castelo de Fontán e a praia de Cirro e que está catalogado de dificultade baixa.
Esta iniciativa (o roteiro Mariñán) enmárcase no programa que Terra das Mariñas está a desenvolver nos seus Concellos asociados para a recuperación e posta en valor de antigos sendeiros. Tanto o Alcalde de Sada como o Concelleiro de Turismo destacan que o roteiro litoral do que dispón Sada contribúe a mellorar a calidade de vida de todos os veciños e veciñas do municipio e supón un novo atractivo turístico para a vila.
